«Цень» Яўгена Шварца зноў у трэндзе! – «Творчы вечар» з Віктарам Кісцянём (аўдыё)

• Перадача: Творчы вечар
• Дата: 25.11.2020

У Мінску на 1 снежня плануецца прэм'ера музычнага спектакля «ЦЕНЬ» па аднаіменнай п'есе ЯЎГЕНА ШВАРЦА – новы сумесны праект ДЗЯРЖАЎНАГА КАМЕРНАГА ХОРУ БЕЛАРУСІ і ансамбля «МУЗЫЧНАЯ АРКА» БЕЛАРУСКАГА САЮЗА КАМПАЗІТАРАЎ.

Напісаная ў канцы 30-х гадоў мінулага стагоддзя, п'еса сёння набыла асаблівую актуальнасць. Імпульсам да стварэння пастаноўкі паслужыў аўдыёспектакль АЛЕГА АНОФРЫЕВА, які сам зрабіў лібрэта і выканаў галоўныя ролі.

Беларуская версія спектакля прадстаўлены ў жанры мюзікла ці нават рок-оперы, музыку да якой напісала ВЕРА ЗАЙЦАВА. У Расіі яе творчасць добра вядома, дзякуючы творам для сімфанічнага аркестра, рускага народнага аркестра, жаночага хору. Музыка да спектакля «ЦЕНЬ» была напісана па просьбе СВЯТЛАНЫ КУДЗІНАЙ, якая з 2019 года з'яўляецца мастацкім кіраўніком інструментальнага ансамбля салістаў «МУЗЫЧНАЯ АРКА», створанага на базе САЮЗА БЕЛАРУСКІХ КАМПАЗІТАРАЎ.

Галоўныя і эпізадычныя ролі ў спектаклі выконваюць салісты ЗАСЛУЖАНАГА КАЛЕКТЫВУ ДЗЯРЖАЎНАГА КАМЕРНАГА ХОРУ БЕЛАРУСІ (мастацкі кіраўнік НАТАЛЛЯ УЛАДЗІМІРАЎНА МІХАЙЛАВА).

Рэжысёрам, мастаком-пастаноўшчыкам і выканаўцам галоўных роляў ВУЧОНАГА і ЦЕНІ выступае папулярны акцёр тэатра і кіно ІГАР ПЯТРОЎ. Балетмайстар – МАРЫНА ФІЛАТАВА.

У спектаклі гучыць цудоўная паэзія ДЗМІТРЫЯ ЕРМАЛОВІЧА-ДАШЧЫНСКАГА.

Госці аўтара праграмы «ТВОРЧЫ ВЕЧАР» ВІКТАРА КІСЦЯНЯ – рэжысёр спектакля акцёр ІГАР ПЯТРОЎ і выканаўца адной з галоўных роляў ВЕРАНІКА ЧАРНЯЎСКАЯ.

Аўдыёверсія праграмы за 23 лістапада ў 21-05.